واحد اسكندرانى بيستعبط على القاهروية

السلام عليكم جميعا .....

النهارده موضوع عباره عن شويه فروق بينا كأسكندرانيه وبين اخواتنا وحبايبنا المصاروه "اللى من القاهره يعنى"

فى القاهره : ايه ده الحاجه دى "جامده اخر حاجه"

فى اسكندريه : ايوووه الحاجه دى جامده اوى

فى القاهره : انا مش نمت من امبارح "تحس انك بتكلم طفل"

فى اسكندريه : انا منمتش من امبارح "ناس جد الجد"

فى القاهره : انا هشوف الموضوع ده

فى اسكندريه : انا حشوف الموضوع ده

فى القاهره : استيكــه "اللغه العربيه واخده حقها شويه معاكم" وقال كمان مساحه "بلدى بلدى يعنى"

فى اسكندريه : جومه عادى خالص جومه

فى القاهره : صباعى "ياعينى عليك يابنى"

فى اسكندريه : صوبعى اهى مفيهاش مشكله فله شمعه منوره اهى

فى القاهره : الزمالك عمل ايه النهارده الاجابه كيسب

فى اسكندريه : عادى الزمالك كسب ليه نزود حروف وخلاص مش لما نقدر على الكام حرف اللى عندنا نبقى نزود

فى القاهره : جلابيه "كلمه مبالغ فيها"

فى اسكندريه : عبايه "زى الفل"

فى القاهره : يقولك ميكروباص "ثقافتك انجليزى اوى يا عمنا MICRO BUS"

فى اسكندريه : بنقول مشروع "شجع لغه بلدك"

فى القاهره : قال ايه اوطه يااااااااااااااى "دى كلمه من السبيعينات اصلا واتلغت بقالها "100سنه

فى اسكندريه : طماطم "جايه من كلمه توماتوز يا جماعه لازم يكون عندك ثقافه انجليزى برضه"

فى القاهره : خمسين قرش "الرياضه واخده معاكم حقها اوى يا اخواتى"

فى اسكندريه : نص جنيه "اهى يا جدعان فيها ايه زى العسل اهى"

فى القاهره : قال ايه يا اخويا يقولولك لبان " والنبى انا لو دخلت سوبر ماركت اقوله هات لبانه ليكرشنى بره"

فى اسكندريه : مستيكه "شايفين الاسم كله مازيكا"

فى القاهره : (سد الحنك) على رأى عادل امام يا خراااااااااااابى وبيجيلكم نفس تاكلو حاجه اسمها كده

فى اسكندريه : (حلاوه دقيق) شايفين الاسم متدلع ازاى يعنى دى الحلاوه بتاعه الدقيق

فى القاهره : يقولولك ايه (جبنه نستو) نستو ده اصلا كان فراش فى مدرسه الانشطار النووى الاعداديه بنات

فى الاسكندريه : جبنه مثلثات عادى ماهى شكلها كده مش بنتفلسف احنا

فى القاهره : (جبنه رومى) دى على اساس انها بنت عم الديك الرومى

فى اسكندريه : الجبنه مصدرها من تركيا يبقى اسمها جبنه تركى ولا ايه يا جماعه

فى القاهره : قال ايه طعميه ويجى واحد يتفلسف ويكتبلك طع100 ناس فاضيه

فى اسكندريه : فلافل معروفه طول عمرها زى ما فى روميو وجوليت فيه فول وفلافل

فى القاهره : يقولوا ايه فول بالزيت حار "اكيد بيجيبو الزيت ده من العربيات"

فى اسكندريه : فول بالزيت والليمون مش بنحب ننكر حق حد زي ما نقول الزيت نقول الليمون

فى القاهره : يقولك ايه على البمبونى (ارواح) انتم الاطفال عندك طالعين من بيت الرعب ولا ايه عادى دى المفروض حاجه للاطفال يعنى اسمها يبقى لايت بمبونى زى عندنا فى اسكندريه

ولا فى الصيف بقى ينزلو بسلطاتهم ببابا غنوجهم ويقرفونا بقى زحموا القاهره لغايه لما عملوا دوله مع حالهم جوه القاهره واتقسمت 4 محافظات باين ولا ايه مش عارفلهم الصراحه وجايين يبوظوا بقى احسن حته فى مصر ويزحموها ولا لما ينزلو البحر البحر بيبقى عادى زى باقى البحور لونه ازرق فله شمعه منوره فجأه وبقدره قادر يبقى لونه بنى حاولت جاهدا ان اجد تفسير للحكايه دى مش لاقى

فى النهايه احب اقولكم القهراويه دول حبايبى حبايبى بحبهم موت موت موت موت

وعلى رأى كريم عبد العزيز تغمضليش عين غير لما اطمن عليهم واحد واحد بالمازنجر




و إوعى واحد قاهروى يزعل

إحنا مش منجيب فى سيرة حد إحنا ناس جدعان أوى
فى أى حتة تلاقينا و فى أى عركة مش هاتلاقينا
أيووووووووووووه يا جدعان

السلام عليكم ورحمة الله وبركاتة

اختي جوليت





ايوة ياجدعان دة كلة شيلاه ومعبعبة وسكتة من زمان لالالا

انت كدة اكبد لسة هطلعي الي مستخبي في حلقات تانية

ولا اقول لك اعمليها اجزاء احسن هههههههههه



مممممممممممممم



تقبلي تحياتي

ههههههههههههههههههههههههههههههه ده هو غيه مسلسل يا أستاذ مجدى
أوعدك هاحاول أطلع منها سديهات هههههههههه بس التوزيع عليك

السلام عليكم ورحمة الله وبركاتة

اختي الفاضلة / جوليت



انتي تامري بس هيكون لية نسبة علي التوزيع



ماشي

[img][/img]
تسلمينننننننننننننننننننننننننننننننن